Экстремизмге қарсы: мектептегі қауіпсіздік сабақтары

Келес ауданындағы Т. Бердияров атындағы мектепте экстремизм мен терроризмге қарсы ақпараттық-түсіндіру шарасы ұйымдастырылды. Бұл іс-шараның басты мақсаты – мектеп жасындағы балалардың экстремизм мен терроризмге қарсы ақпараттық қорғанысын нығайту, сондай-ақ ұстаздардың осы бағыттағы жұмысына әдістемелік қолдау көрсету болып табылады. Шара барысында қоғамдағы терроризм мен экстремизмнің зияны туралы түсініктерді кеңейту, олардың алдын алу жолдарын насихаттау маңызды міндет ретінде қарастырылды.

Экстремизм мен терроризмнің алдын алу шаралары

Іс-шараға облыстық ақпараттық түсіндіру тобының мүшелері, аудандық Терроризмге қарсы комиссиясының өкілдері, мектеп ұжымы мен оқушылар қатысты. Мамандар терроризмнің мәні мен түрлері, белгілері туралы ақпарат беріп, төтенше жағдайларда дұрыс әрекет ету алгоритмін түсіндірді. Сонымен қатар, экстремизм мен терроризм идеологиясының жасөспірімдер арасында таралу тәсілдері мен үгіт-насихат жұмыстарының белгілері жайлы нақты мәліметтер ұсынылды.

Мектеп ұжымына экстремизм мен терроризм профилактикасын оқу процесіне енгізу жолдары, оқушылардың ақпараттық сауаттылығын арттыру әдістері мен сыни ойлау қабілетін қалыптастырудың маңызы түсіндірілді. Оқушыларға жеке қауіпсіздік дағдыларын, күдікті тұлғалармен және күмәнді контентпен кездескен жағдайда не істеу керектігі жөнінде ұсыныстар берілді. Ақпараттарды дұрыс қабылдау, талдау және тарату жауапкершілігі де назардан тыс қалмады.

Шараның соңында қатысушыларға арнайы келген қонақтар тарапынан қызықты сұрақтарға жауаптар берілді. 200-ге жуық оқушылар мен ұстаздар қатысқан іс-шара Түркістан облысы бойынша ТҚК аппаратының ақпараты негізінде ұйымдастырылды.