Астана командасы боччада екінші орынға ие болды!

Астана қаласында Боччадан Қазақстан Республикасының Кубогының марапаттау рәсімі өтті. Жарысқа 15 өңірден 120 параспортшы қатысып, өзара мықтыларды анықтады. Астана командасы жалпы командалық есепте екінші орынға ие болды.

Марапаттау шарасына дене мүмкіндіктері шектеулі тұлғаларға арналған спорттық даярлау орталығы директорының орынбасары Лескен Елекеев, "Аңса" жеке қорының атқарушы директоры Мұрат Жұманбай және Қазақстан Бочча федерациясының вице-президенті Назым Жанғазинова қатысты. Назым Жанғазинова атап өткендей, "бұл додада алтын, күміс, қола алғандар халықаралық жарыстарға қатысады." Жарыс төрт күн бойы өтті және спортшылар грамота, медаль, кубоктармен марапатталды.

Бочча спортының дамуы

Бочча — тірек-қозғалыс аппаратының ауыр бұзылыстары бар адамдарға арналған доп ойыны. Қазақстанда бұл спорт түрінің ресми дамуы 2021 жылы басталды. Сол жылы "Қазақстан Бочча Федерациясы" құрылып, халықаралық аренада елді танытуға бағытталған жұмыстар қолға алынды.

Жарыс барысында жеңімпаздар ересектер мен жасөспірімдер арасында төрт дәреже бойынша анықталды. Ұйымдастырушылардың айтуынша, басты мақсат — бочча спортын елде дамыту мен танымал ету. Спортшылардың шеберлігін арттырып, ұлттық құрама командасының сапын қалыптастыру да маңызды міндеттер қатарында.